篤背脊的藝術[轉載]

篤背脊的藝術[轉載

]

 

有讀者問有同事『偷雞』，做事馬虎縮骨側側膊唔多覺，未搞掂就當做好哂，究竟應該閒事莫理明哲保身扮眼盲，抑或應該做正義超人為民除害篤爆佢好？之但係篤佢出來肯定結下仇口，日後如何相見歡？扮眼盲袖手旁觀又會俾人話立壞心腸睇人點死，講又死唔講又死，裡外不是人，問我應該點算好？
有這樣的同事慘之餘，老闆一樣慘，易請難送再問殘局該如何收拾？

Interesting!
這種問題公司越大越嚴重，因為架床疊屋大把空間走位閃避，分分鐘再加上一個權責不清，人多口雜講過與否没有很多人會記得清楚，要卸膊相對較小公司是他也是你和我容易。至於該講不該講，就要先審時度勢再看場合、事情的輕重做判斷，否則事無大小係又篤唔係又篤，邊有公信力，誰個會聽？還有就是要識睇風頭火勢眉頭眼額，要知自己斤両，那人是何方神聖，背後是否有人操縱包庇，擒賊要先擒王，而那個王，一己之力是否擒得住。

是小職員的話，正所謂事不關己己不勞心，閒事莫理閒地莫企，顧掂自己先，多管閒事吃力不討好肯定自尋煩惱攞黎煩。要是同輩說話就唔係咁講啦，唔出聲齊齊揹鑊不能夠當講笑，上頭問責起來肯定走唔甩。不過可以先君子後小人。見同事唔對路，先善意提醒對方留意，私下收集好證據，要是對方知驚從善如流就不必再提。要是對方不領情依舊搏大霧，就要挺身而出稟報上級，否則任由出事累全家。稟報都要有技巧，更要做足準備功夫，否則在上級眼中只是個打小報告的嘍囉。如果能夠把握機會，毋須加鹽加醋如實陳述，連隨提出補救辦法及解決方案，就能顯示身價。要是膽小怕事又怕得罪人，誓要做個老好人，就乾脆毒啞與及插盲自己算了吧，還煩來幹甚麼？

在我而言有這樣的同事絶對是好事，難得有人自願犧牲自己抬高我，開心還來不及！請着這種員工又有幾慘？大把不足連查找的時間氣力都慳番，初犯再犯三犯大條道理炒人還須擇日子？

作者

 張慧敏